Azərbaycan Milli Elmlər Akademiyası Nizami Gəncəvi adına Ədəbiyyat İnstitutunun bir neçə əməkdaşı “Qafqaz Media” İctimai Birliyi tərəfindən “Xarıbülbül” medalına və diplomuna layiq görülüb. Təqdimetmə AMEA-nın vitse-prezidenti, Nizami Gəncəvi adına Ədəbiyyat İnstitutunun baş direktoru, akademik İsa Həbibbəylinin iştirakı ilə baş tutub.
Medalları ictimai birliyin sədr müavini Sahilə Abdullayeva təqdim edib. Alimlərdən filologiya elmləri doktoru, professor Məmməd Əliyev, filologiya elmləri doktoru Mahirə Quliyeva, filologiya üzrə fəlsəfə doktoru, dosent Aygün Bağırlı, filologiya üzrə fəlsəfə doktoru, Birinci Qarabağ Müharibəsi qazisi Qədim Qubadov təltif olunublar.
