Nizami Gəncəvi adına Ədəbiyyat İnstitutunun əməkdaşları filologiya üzrə fəlsəfə doktorları Zakirə Əliyeva və Aynurə Paşayeva aprelin 26-da Qusar şəhərində keçirilən “XX əsrdə türk-müsəlman xalqlarına qarşı soyqırımları” mövzusunda V Beynəlxalq elmi konfransda iştirak etmişlər. Qeyd edək ki, Prezident İlham Əliyevin “1918-ci il azərbaycanlıların soyqırımının 100 illiyi haqqında” Sərəncamına uyğun olaraq təşkil edilən beynəlxalq konfrans Azərbaycan Milli Elmlər Akademiyasının A.A.Bakıxanov adına Tarix İnstitutu, Türkiyə Respublikası Nazirlər Kabineti yanında Atatürk Mədəniyyət, Dil və Tarix İdarəsi Atatürk Araşdırma Mərkəzi, Türkiyənin Azərbaycandakı səfirliyi və Qusar Rayon İcra Hakimiyyətinin birgə təşkilatçılığı ilə keçirilmişdir. Konfransda Azərbaycanla yanaşı, Türkiyə, Rusiya Federasiyası və onun müxtəlif subyektlərindən, Polşa, Albaniya, Özbəkistan, Qazaxıstan, Pakistan, Hindistan və İraqdan elm adamları, görkəmli tarixçilər iştirak edirdilər.
Açılış mərasimində Azərbaycan Respublikası Prezidentinin ictimai-siyasi məsələlər üzrə köməkçisi Əli Həsənov Prezident İlham Əliyevin konfrans iştirakçılarına müraciətini təqdim etdi.
Sonra Azərbaycan Milli Elmlər Akademiyasının vitse-prezidenti, akademik İsa Həbibbəyli, AMEA-nın A.A.Bakıxanov adına Tarix İnstitutunun direktoru Yaqub Mahmudov, Qusar Rayon İcra Hakimiyyətinin başçısı Şair Alxasov çıxış edərək, son iki yüz ildə Azərbaycan xalqının başına gətirilən müsibətlərdən danışdılar.
Konfransın “XX əsrdə Azərbaycan xalqına qarşı soyqırımları” bölməsində f.ü.f.d., dosent Zakirə Əliyevanın “ Soyqırımlar tarixinin tədqiqi və Yaqub Mahmudov məktəbi”, f.ü.f.d. Aynurə Paşayevanın “20 Yanvar faciəsi Azərbaycan mətbuatında (1990-2000)” mövzusunda məruzələri dinlənildi. Konfrans iştirakçıları, xüsusilə xarici qonaqlar hər iki məruzənin nümayiş etdirilən slayd-təqdimatlarını maraqla izlədi.
