Türkiyənin Azərbaycan Respublikasındakı Səfirliyi nəzdində fəaliyyət göstərən Azərbaycan Mədəniyyət Mərkəzi Avrasiya Yazarlar Birliyi və Türkiyənin aparıcı elmi qurumları, universitetləri, mədəniyyət qurumları ilə birgə ədəbiyyatımızın təbliği istiqamətində işlər aparmaqdadır.
Azərbaycan Mədəniyyət Mərkəzində keçirilən növbəti görüşdə Azərbaycan Milli Elmlər Akademiyası Nizami Gəncəvi adına Ədəbiyyat İnstitutunun dosenti, doktor Təhminə Bədəlova Mərkəzin “Fəxri mükafat”ı ilə təltif edilib. Azərbaycan Mədəniyyət Mərkəzinin direktoru Samir Abbasov Təhminə Bədəlovanın ədəbi layihələrdə iştirakı, Nizami Gəncəvi irsinin tədqiqi və təbliği istiqamətində göstərdiyi səyləri yüksək qiymətləndirilib.
Nizamişünas alim Türkiyədə keçirilən konfrans və simpoziumlarda Azərbaycan ədəbiyyatına dair məruzələrlə çıxış etmiş və Azərbaycan ədəbiyyatı ilə bağlı yeni elmi-tədqiqat layihələri həyata keçirmişdir. “11-19-cu əsrlərdə Azərbaycan poeziyası” və “Nizami Gəncəvinin “Xəmsə”sindən seçmə hekayələr” mövzusunda tədqiqat əsərləri bu sıradan Azərbaycan ədəbiyyatının Türkiyədə tanıdılması istiqamətində mühüm layihələrdir.
Türkiyədə “Dergipark” sistemine daxil olan “KULLİYAT Osmanlı Araştırmaları Dergisi”, “Eski Türk Edebiyatı Araştırmaları Dergisi”, TURAN Uluslararası Sosyal ve Beşerî Bilimler Dergisi ve Avrasya Yazarlar Birliği'nin “Kardeş kalemler”, Türk Edebiyatı Vakfı'nın “Türk edebiyatı”, “Türk dili ve edebiyat” və “Üç çizgi” dərgilərində ədəbiyyatşünas alimin məqalələri yayımlanmışdır.
Görüş zamanı gələcəkdə həyata keçiriləcək yeni elmi-tədqiqat layihələri də müzakirə olunub.