Bu günlərdə Azərbaycan Dövlət Mədəniyyət və İncəsənət Universitetinin professorları Abbasqulu Nəcəfzadə və Vamiq Məmmədəliyevin " MUĞAM"adlı Bakalavr pilləsində təhsil alan tələbələr üçün DƏRS VƏSAİTİ işıq üzü görüb.( Elmi redaktor: Rəna Azər qızı Məmmədova - AMEA-nın müxbir üzvü, sənətşünaslıq üzrə elmlər doktoru, professor)
Sənətşünaslıq üzrə elmlər doktoru, Azərbaycan Milli Konservatoriyasının professoru Abbasqulu Nəcəfzadə və əməkdar artist, Azərbaycan Dövlət Mədəniyyət və İncəsənət Universitetinin professoru Vamiq Məmmədəliyevin “Muğam” adlı dərs vəsaiti müvafiq fənnintədrisi üçün yazılmışdır. Bu kitab ADMİU, AMK, BMA, ADPU, NDU, həmçinin musiqi təmayüllü digər təhsil ocaqlarının tələbələri üçün nəzərdə tutulub. Kitabdan eləcə də musiqişünaslar və muğamsevərlər də istifadə edə bilərlər.
Müstəqilliyin ilk illərindən başlayaraq ölkəmizin təhsil sistemində aparılan bir çox uğurlu dəyişikliklər və islahatlar ali təhsil ocaqlarının bakalavr pilləsində də özünü müsbət cəhətdən göstərməkdədir. Bu səbəbdən həm dərsliklər, dərs vəsaitləri, həm də tədris proqramları ən son üsul və metodlarla hazırlanılır. Təqdim edilən “Muğam” adlı dərs vəsaiti də yeni tələblər əsasında işlənilib.
AMK və ADMİU ölkəmizin müxtəlif şəhərlərində fəaliyyət göstərən uşaq musiqi və incəsənət məktəbləri, musiqi kollecləri, eləcə də musiqi təmayüllü ali təhsil ocaqları üçün mütəxəssis müəllim, tədqiqatçı, ifaçı kadrlar hazırlayır. Tədris edilən bufənn muğamları daha geniş və mükəmməl şəkildə öyrənməyi qarşıya bir məqsəd kimi qoymuşdur.
Kitabı hazırlayarkən musiqişünaslıq, muğamşünaslıq, ifaçılıq sənətinin tarixi mövzusunda yazılmış bir sıra dərsliklərdən bəhrələniblər.
“Muğam” adlı dərs vəsaiti işlənilərkən nəzəri və təcrübi təhlil metodu əsas götürülüb. Azərbaycanın və xarici ölkələrin görkəmli alimlərinin ifaçılıq sənəti və muğamşünaslıq mövzusunda tədqiqatlarındakı konsepsiyalar, klassik Şərq ədəbiyyatındakı bədii fikir və obrazlar “Muğam” fənninin elmi-nəzəri bazasını təşkil edir.
“Muğam” fənninin tədrisində məqsəd muğam ifaçılığını elmi-nəzəri cəhətdən təhlil etmək, ifaçılıq sənətinə təsir göstərən amilləri, müasir ifaçılığın vəziyyəti ilə yanaşı, tələbələrə Azərbaycan muğamlarının tarixi, inkişaf mərhələləri haqda bir sıra ən mühüm məlumatı çatdırmaqdır. Bu baxımdan dərs vəsaitinin hazırlanması zəruri və vacib məsələlərdəndir.
Muğamların təbliği, unudulmuş, itib-batmış şöbə və guşələrin elmi baxımdan bərpası bugünkü gənc nəslin qarşısında duran əsas vəzifələrdəndir.
Əsərdə Azərbaycan məqamlarının not nümunələri (səs sırası) təqdim edilərkən müvafiq muğam dəstgahlarının tonallıqları (tar aləti əsas götürülərək) olduğu kimi saxlanılmışdır.
VÜQAR ƏHMƏD,
filologiya üzrə elmlər doktoru,professor, AMEA Nizami adına Ədəbiyyat İnstitutunun"Ədəbiyyatşünaslıq" Yaradıcılıq Birliyinin sədri
