Elmi-tədqiqat şöbələri

Ədəbiyyat İnstitutunda Azərbaycan şifahi xalq ədəbiyyatı və yazılı abidələr şöbəsi 2003-cü ildən fəaliyyət göstərir. Şöbə ayrıca  elmi- tədqi­­­­qat strukturu kimi  Ədəbiyyat və İncə-sənət İnstitutu təşkil olunandan fəaliyyət göstərmişdir. İnstitutun tərkibində 1934-cü ildə Folklor şöbəsi yaranmış və bu struktur vahidi ötən müddətdə  şifahi ədəbi irsin toplanılmasında və öyrənilməsində faydalı işlər görmüşdür.  Azərbaycan Milli  Elmlər Akademiyasının Rəyasət Heyəti 1990-cı ildə Ədəbiyyat İnstitutu nəzdində Folklor sarayının yaradılması haqqında qərar çıxardıqdan sonra  Folkor şöbəsinin fəaliyyəti dayandırıldı. Onun təcrübəli elmi əməkdaşları Folklor sarayına cəlb edildilər. 2003-cü ildə Ədəbiyyat İnstitutunda struktur dəyişikliyi edildiyi zaman institutun Elmi Şurası  Azərbaycan şifahi xalq ədəbiyyatı və yazılı abidələr şöbəsini yenidən bərpa etməyi qərara aldı. Folklor şöbəsinə əvvəlki dönəmlərdə Hənəfi Zeynallı, Məmməd Hüseyn Təhmasib, Mirəli Seyidov, İsrafil Abbaslı kimi görkəmli alimlər rəhbərlik etmişdir. 2003- cü ildən şöbəyə Əməkdar elm xadimi, professor Məhərrəm Qasımlı baş­çılıq edir. Şöbənin elmi-tarixi həyatında S.Mümtaz, H.Əlizadə, Ə.Tahirov, Ə.Axundov, N.Seyidov, H.Qasımov, B.Abdulla, T.Fərzəliyev, E.Əlibəyzadə, Q.Paşayev kimi görkəmli elm adamlarının unudulmaz xidmətləri vardır.

 Şöbə “Azərbaycan şifahi xalq ədəbiyyatının tədqiqi problemi” üzrə  Azərbaycan şifahi xalq ədəbiyyatının tarixi və nəzəri məsələləri; ədəbi abidələrin tədqiqi, şifahi və yazılı ədəbiyyatın qarşılıqlı münasibətlərinin araşdırılması mövzularının tədqiqi  ilə məşğul olur.