14 oktyabr tarixində Azərbaycan Respublikası Mədəniyyət Nazirliyinin təşkilatçılığı ilə keçirilən “Azərbaycanda Türkmənistan mədəniyyəti günləri” çərçivəsində M.F.Axundov adına Azərbaycan Milli Kitabxanasında “Türkmənistan ədəbiyyatı guşəsi”nin açılışı və ziyalıların iştirakı ilə dəyirmi masa keçirilib.
Tədbirdə Azərbaycan Respublikasının Mədəniyyət nazirinin müavini Fərid Cəfərov, Türkmənistanın Azərbaycan Respublikasındakı fövqəladə və səlahiyyətli səfiri Qurban Elyasov, Türkmənistan Respublikasının Mədəniyyət nazirinin müavini Nursahet Şirimov, eləcə də elm və mədəniyyət xadimləri və digər aidiyyəti şəxslər iştirak ediblər.
Əvvəlcə Azərbaycan Milli Kitabxanasında “Türkmənistan ədəbiyyatı guşəsi”nin açılışı olub. Açılış mərasimində guşənin əhəmiyyəti vurğulanıb. Tədbir iştirakçıları guşə ilə tanış olaraq, sərgilənən kitabların iki ölkə arasında mədəniyyət və ədəbiyyat sahəsində əməkdaşlığı daha da gücləndirəcəyini bildiriblər.
Ziyalıların iştirakı ilə keçirilən dəyirmi masanı Azərbaycan Milli Kitabxanasının direktoru professor Kərim Tahirov açaraq qonaqları salamlayıb. Qeyd edib ki, Türkmənistan və Azərbaycan qardaş xalqlardır. “Azərbaycanda Türkmənistan mədəniyyəti günləri” çərçivəsində “Türkmənistan ədəbiyyatı guşəsi”nin açılışı iki ölkə arasında mədəni əlaqələrin yeni mərhələsinin başlanğıcıdır və bu təşəbbüs gələcəkdə daha genişmiqyaslı tədbirlərin, o cümlədən elmi konfransların keçirilməsinə, eləcə də elm, ədəbiyyat və kitabxana sahəsində əməkdaşlığın inkişafına zəmin yaradacaq. Direktor həmçinin yaxın gələcəkdə Azərbaycan Milli Kitabxanası ilə Türkmənistan Milli Kitabxanası arasında əməkdaşlıq memorandumu imzalanacağını, qarşılıqlı əlaqələrin və kitab mübadiləsinin genişlənəcəyini diqqətə çatdırıb.
Azərbaycan Respublikası Mədəniyyət nazirinin müavini Fərid Cəfərov çıxışında Azərbaycan və Türkmənistan xalqlarını qədim tarixi və mədəni əlaqələrin birləşdirdiyini vurğulayıb. O qeyd edib ki, dövlət dəstəyi sayəsində mədəni əməkdaşlıq daha da inkişaf edir və bu tədbirlər xalqlar arasında qarşılıqlı anlaşma və dostluğun güclənməsinə xidmət edir. Nazir müavini “Azərbaycanda Türkmənistan mədəniyyəti günləri” çərçivəsində Milli Kitabxanada “Türkmənistan ədəbiyyatı guşəsi”nin açılışı iki ölkənin Milli Kitabxanaları arasında əməkdaşlığın təməlini atmaqla yanaşı, iki ölkənin ədəbiyyat və mütaliə sevəlnəri arasında da çoxdan gözlənilən kitab mübadiləsinə şərait yaradacağını söyləyib.
Türkmənistan Respublikası Mədəniyyət nazirinin müavini Nursəhet Şirimov Azərbaycanda türkmən ədəbiyyatına və mədəniyyətinə olan geniş maraq və diqqətdən məmnunluğunu bildirib. O, Milli Kitabxanada “Türkmənistan ədəbiyyatı guşəsi”nin yaradılmasına görə kitabxananın rəhbərliyinə təşəkkür edib. Nazir müavini həmçinin guşənin yeni nəşrlərlə davamlı zənginləşdirilməsi üçün addımlar atılacağını deyib.
AMEA-nın prezidenti, Nizami Gəncəvi adına Ədəbiyyat İnstitutunun direktoru, akademik İsa Həbibbəyli çıxışında “Azərbaycanda Türkmənistan mədəniyyəti günləri” keçirilməsi böyük tarixi əhəmiyyətə malik olan mədəniyyət hadisəsi olduğunu bildirib. Azərbaycan və Türkmənistanın ortaq köklərə, dilə və mədəniyyətə malik olan qardaş xalqlar olduğunu vurğulayıb. Böyük türkmən şairi Məxdumqulu Fəraqinin yaradıcılığından ətraflı bəhs edən akademik AMEA-nın Nizami Gəncəvi adına Ədəbiyyat İnstutunda “Məxdumqulu Fəraqinin mərkəzi”nin mövcud olduğunu söyləyib.
Türkmənistan Respublikasının Azərbaycan Respublikasındakı fövqəladə və səlahiyyətli səfiri Qurban Elyasov ədəbiyyat və mədəniyyəti xalqlarımız arasında etibarlı körpü kimi səciyyələndirib. Mədəniyyət günlərinin keçirilməsinin iki xalq arasında dostluğun, həmrəyliyin güclənməsinə xidmət etdiyini söyləyib. Azərbaycan Milli Kitabxanasında “Türkmənistan ədəbiyyatı guşəsi”nin açılmasını dostluq, qardaşlıq münasibətlərinin simvolu adlandırıb və Milli Kitabxananın rəhbərliyinə təşəkkür edib. Səfir yaxın gələcəkdə Türkmənistan Milli Kitabxanasında da “Azərbaycan ədəbiyyatı guşəsi”nin yaradılmasının vacibliyini vurğulayıb.
Tədbirdə Azərbaycan Yazıçılar Birliyinin sədr müavini, Mətbuat Şurasının sədri, Əməkdar mədəniyyət işçisi Rəşad Məcid, Türkmənistan Respublikası Mədəniyyət nazirliyininYaradıcı işçilərlə iş şöbəsinin müdir müavini, şair, tərcüməçi Türkmənistanın Əməkdar mədəniyyət işçisi Akmyrat Rejebov, AMEA-nın Folklor İnstitutunun direktoru, filologiya üzrə elmlər doktoru Hikmət Quliyev, “Türkmənistan” qəzetinin xüsusi müxbiri, şair, tərcüməçi, Türkmənistan Prezidentinin “Türkmənistanın qızıl əsri” mükafatı laureatı Ysmaýyl Tagan, Türkmənistanın “Nesil” qəzetinin məsul katibi, şair, tərcüməçi, Türkmənistan Prezidentinin “Türkmənistanın qızıl əsri” mükafatı laureatı Orazmyrat Myradov, AMEA-nın Nizami Gəncəvi adına Ədəbiyyat İnstitutunun “Məxtimqulu Fəraqi adına Türkmən ədəbiyyatı mərkəzi”nin rəhbəri, fil.üzrə fəl.doktoru İsmixan Osmanlı çıxış ediblər. Onlar öz çıxışlarında Azərbaycan və Türkmənistanın mədəni və elmi əlaqələrinin uzun və zəngin tarixə malik olduğunu vurğulayıblar. Qeyd ediblər ki, qarşılıqlı əməkdaşlıq nəticəsində həm Azərbaycan, həm də Türkmənistanın mədəni və ədəbi irsi daha geniş oxucu auditoriyasına çatdırıla, ortaq nəşrlər və tərcümə layihələri uğurla həyata keçirilə bilər. Bildirib ki, mədəniyyət və ədəbiyyat sahəsində keçirilən görüşlər gələcəkdə yeni layihələrin həyata keçirilməsinə, həmçinin gənc tədqiqatçıların və yazıçıların qarşılıqlı təcrübə mübadiləsinə, eləcə də iki ölkənin mədəniyyət sahəsində əməkdaşlıq imkanlarının daha da inkişafına şərait yaradacaq.
